National Convention shanglawm jahkrup ai hta ahkyak tawn nhtawm mahtai lu ra ai amu kaba ni-
1. Anhte a Mungdan hta Hpyendap Asuya ahkaw ahkang madu la nna uphkang wa ai aten na sai. Ndai mungdan uphkang ai Asuya ahkaw ahkang hpe ahkaw ahkang madu tawn ai hpyen ningbaw ningla ni nan myit hkawn nna dat kaw ai sha nrai yang Asuya ahkaw ahkang htawt sit galai ap hkat na yak nga ai.
Aten ndai daram na hkra galaw ai National Convention gaw Hpyen ningbaw ningla ni shanhte myit ra ai hku ahkaw ahkang hpe htawt sit galai ap hkat na matu yaw shada ai pandung hte galaw nga ai rai sai.Hpyen asuya up hkang lai hpe tsepkawp gun kau nhtawm Asuya uphkang lai nnan galai la na matu shaning law law wa Mung masa uhpung amyu myu, Amyu masha laknak lang gasat poi shang lai wa ai law law rai sai.Mungdan grau hpang hkrat mat wa ai. Amyu masha ni asak du baw law law sum mta wa ai.Nga dung nga sa madang hkrat nem mat wa nhtawm shinggyim ahkaw ahkang (human rights) aja awa jahten kau hkrum ai hta lai nna akyu byin pru wa ai lam hpa n-nga ai. Matut nna hpyen dap Asuya uphkang lai hpe tsep kawp gun kau lu na matu jawm shakut ai gaw grau kaba ai tsinyam hkrum katut wa na sha rai nga ai. Dai majaw ndai Myen mungdan hta hpyen ningbaw ningla ni nshang lawm ai uphkang Asuya tup hkrak grai nbyin lu na sha re. Hpyen dap ni shanglawm uphkang ai Asuya tara shang gaw sharawt na matu gaw sharawt nga ai N.C nan rai sai. Dai majaw Hpyen dap ni shanglawm lu ai tara shang npawt nhpang Constitution hpe ka shapraw shagrin da ya na zuphpawng kaba N.C rai nga mali ai. "Road Map" mung dai rai sai. Dai majaw ra ai , nra ai ngu lata la na nnga ai. Hpyen ningbaw ningla ni hte ganawn mazum pawng hpawm nhtawm Mungdan uphkang Asuya gaw sharawt sa wa na lam langai chyu sha nga nga ai kata kaw N.C zuphpawng nhtawm, mahtai tam nga ai rai sai. Mahtai kaja byin mai ai made shabyin da lu ra nga mali ai.
2. N.C kaw nna masat jahkrat dawdan mat wa ai npawt nhpang tara kanu ni yawng mayawng Hpyendap ni a matu hkrai chyu sha akyu nga sa wa na re ngu nna nmai hkam la sana rai nga ai. Mungdan langai mi ting hku nna Amyu masha ni, Mungchying shawa dawtsa ni, nbung ai makam masham hkapla nna rau ngadung ngasa shajang ai Mungdan masha ja nban ni yawng a matu rawt jat galu kaba sa wa mai na hpe masat shalawm shagrin da shajang ra nga ai.
Ahkyak dik ai gaw-
Langai: Ndai mungdan hta amyu masha law law pawng hpawm nga ai. Amyu masha law law ni a daidaw buga "lamu ga" ni hpe pawng kau nna Munghpawm Mungdan ngu gaw sharawt tawn da ai.Mung masa, sut masa, shinggyim lam masa, makam masham lam, htunghking lam, machye machyang hpaji hparat sharawt shatsaw la sa wa ai hta rap ra ai ahkaw ahkang jai lang lu ai, maren mara re ai akyu ni hkam sha lu na matu makawp maga da ya ai npawt nhpang Constitution masat shagrin ra nga ai.
lahkawng: Amyu masha ni a uphkang ginra shagu hta, ga shadawn Self Administrative State, Self Adminnistrative Zone, Self Adminnistrative Area ni yawng hta Nationalities ni kata na lata san da ai Amyu masha ningbaw ni hpe nan ahkang aya ap ya nhtawm Asuya uphkang lai shagrin da lu ra nga ai.
Masum: Ndai Mungdan kaw nga shanu ai, nga pra ai masha nlang hte yawng hte hpe Mungkan shinggyim sha madang dep du ai Democracy lai hkam sha shajang lu ai rai ra nga ai.
Mali: Munghpawm Myen Mungdan a maigan mung ni hte seng hkat ai Foreign Policy gaw kadai maga mung nkap ai Neutralism rai ra nga ai. Anhte mungdan a dinghku de shang chyinglau ya ai hpe nhtan shai ra ai. N'gun  ja ai mungdan ni a lapran hta maga mi de sa kap nhtawm tinang a mungdan hte mung masha ni hpe nga ula kaba ni daru hkat ai kata hta tsingdu ni kabye sat kau ai nhkrum shangun na ahkyak kaba rai nga ai. Dai majaw Non allience hpung hta lawm ra nga ai.
Manga: Mungdan simsa lam hte seng nna ya simsa tawn ai garai nlaw ai, garai n' ngang kang ai .Uhpung uhpawng hkum hkum tsup tsup hte Mungdan langai mi ting simsa lam shangang shakang shagrin da lu hkra hkrang shapraw sa wa na ra nga ai. Tara Upadi hte uphkang ai Asuya uphkang lai hpe hkapla shajang na, sinat laknak hte gasat gala hkat nga ai yawng hpe jahkring kau nna, Mung masa tsun bawng hkat nhtawm mara dat kau ai hte simsa shangun na.
3. Ya bai hpawng ai gaw jahtum rai sai nga nna shabra tawn sai.
Gram na, jat na, shaw kau na yawng ndai jahtum na lang hta galaw jahkum shatsup la sa wa ra sai re majaw N.C zuphpawng hkum malai ni hku nna myit galu galang hte sung sung sumru tsan tsan yu jasat let sa shang lawm na matu shatsam ai. KIO dat gasa ni hte rai rai, WMR hte rai rai, kaga myitsu ni hte rai rai bawng jahkrup la nna hpaji jaw ai hpe lu la sa wa ra ai.
Zahkung Ting Ying
Ningbaw Kaba
NDAK Ginjaw, Pangwa
No comments:
Post a Comment