Gin Jaw Hkrum Ra Zuphpawng De Tang Madun ai Laika

De,

Ginjaw Komiti

15 lang na ginjaw komiti hkumra zuphpawng

KIO/ KIA

                                    KIO/KIA DU KABA HPANG DE TANG DA AI LAIKA

1. NC hta KIO/KIA hku nna tang shawn na matu la sa ai proposal hpe SPDC wa tsep kawp n jahta ya ai sha n-ga myit mung n-myit ya ai hta KIO/KIA gaw SPDC aq [constitution]referendum hpe madi shadaw dat ai gaw mau n-ma re nga ai. Matut nna myen ni woi awn ai tinggyeng akyu tam ai mungmasa lam yan aq hpang hkan ai gaw Chyurum W.P sha ni shada dumbri dumbra byin shangun ai akyu ara sha pru wa nga ai. Teng man ai amyusha lawt lu lamgaloi mung lu wa na n re nna WP myusha ni hpe hpyen wa aq lata de ap kau ya ai hku she lachyum pru wa ai. Dai hku byin wa taw nga ai hpe tsep kawp n ra sharawng ai hku re.

2. KIO/KIA nnan gaw sharawt wa yang jahkrat da ai yawshada lam ni hta WP Myusha ni hkratsumtaw nga ai ahkaw ahkang ni lu la na matu, Myen Myukaba mayu ai hpe kasat na matu re ai hta, ya lam lapran e myusha ni lawt lu ai lam majing n-lu shi yang myen hte kanen nna nga

mat ai gaw shanglawt kaja lu sai majaw kun? Myusha ni aq yaw shada ai lam ni hpring zup mat

sai majaw kun? Matut nna myen ni dipsha ai hpe n ra nna rawt malan ai wa ya gaw myen ni dip

sha ai hpe tara shang hkap la ai lachyum pru mat sai hku re, hpu-shawng hpu-hpuba ni sung

sung myit yu na hpe ra sharawng ai.

3. 1994 ning hta lahkawng maga de gap hkat jahkring ai lam galaw ai raitim anhte ni hpang maga de sha gaphkat jahkring da ai rai nna Myengumshen ni maga de gaw kasat ai lam njahkring ai hpe mu lu ai. Katsi majan re nga ai kani majan hte anhte WP myusha ni kasat shamyit hkrum katut nga nna hpawt ni na ningbaw re nga ai anhte aq ramma kaji kaba ni

yawng gaw dai katsi majan kata hta si hkrum ra ai hte shani shana hkrat sum taw nga ai. Dai kani aq majaw kanu kawa kashu kasha ni yawng rim adup zingri hkrum nga ai hte yawnhkyen myiprwi pru ra nga sai, n-dai lam hpe hpu-shawng hpuba ni laja lana myityu na hpe ra sharawng ai.

4. Hpushawng hpuba share shagan ni dakring dalang shakut lai wa ai lagaw-hkang ni hpe mung n-shaprai nna, mungchying sha kaji kaba yawng, matsan jahkrai gaidaw gaida ni yawng kaw-si hpang gara nga ai ten hta kahpu-ba ni gaw anhte aq hkrap-ngu hkrap-ngoi ai n sen ni hpe na ya nna kam gring ai gawng malai tai tsap ya na hpe kam ga ai. Matut n-na n-pawt nhpang kawn yaw shada ai bandung hpe mung n-tat ai sha anhte hkamsha shoichyum nga ai tsinyam kata na lawt lu wa ai ladat ni hte woiawn na hpe rasharawng ga ai.

5. Myen hpyen gumshem asuya woi awn ai mungmasa gaw shi a asak galu na matu share majaw shanhte aq hpang hkan ai lam hpe KIO/KIA ni gaw jahkring kau nna kaja wa teng man ai mungmasa de lu sa na matu mungshawa hte lata gindun nna teng man ai maga hta WP Myusha ni aq gawng malai tai let ngang ngang tsap ya na hpe ra sharawng ga ai.

Chyurum WP myusha ni hte Ramma ni

USA, India, Denmark, Czech Republic, Laos, U-Ma Ga, Thailand, Hong Kong